اسلام آباد(الفجر آن لائن)وفاقی وزیر توانائی سردار اویس احمد خان لغاری نے چاروں صوبوں کے وزراء اعلیٰ کو واجب الادا بجلی بلز پر خطوط لکھ دیئے۔ وزارت توانائی نے وزیراعظم کی قیادت میں بجلی کی کمپنیوں کی بہتری اور صارفین کے لیے سستی بجلی کے لیے اصلاحات کا اغاز کیا ہے۔ اصلاحات کے تحت مالی وسائل میں اضافہ، بجلی چوری کے خاتمے، اور صارفین کے واجب الادا بلز کی وصولی پر خصوصی توجہ دی جا رہی ہے۔ خط میں وزراء اعلیٰ سے فوری طور پر بجلی کے بقایاجات کی ادائیگی یقینی بنانے کی درخواست کی گئی ہے۔
اویس لغاری نے کہا کہ واجب الادا بجلی بلز کی وجہ سیتوانائی کے شعبے میں جاری اصلاحات متاثر ہو رہے ہیں۔ صوبوں کے مختلف محکمے بجلی کے بلز کی ادائیگی میں غفلت برت رہے ہیں۔بجلی بلوں کی عدم ادائیگی کی وجہ سے پاور کمپنیوں پر مالی بوجھ بڑھ رہا ہے۔ واجب الادا بلز کی وجہ سیبجلی کی بلا تعطل سپلائی میں مشکلات کا سامنا ہو سکتا ہے۔وزراء اعلٰی سے اس معاملے میں فوری مداخلت کی اپیل کی گئی ہے۔خط میں کہا گیا ہے کہ بقایاجات کی عدم ادائیگی سے نہ صرف وفاقی حکومت کو نقصان ہو رہا ہے بلکہ سرکلر ڈیٹ بحران بھی سنگین ہو رہا ہے۔ توانائی کے شعبے میں استحکام کے لیے وفاقی حکومت صوبائی حکومت سے تعاون کی امید ظاہر کرتی ہے۔
