گزشتہ ماہ چکن، دال ماش، سبزیاں ،پھل ،دال چنا، پیاز، مصالحہ جات، چینی، گڑ، دال مسور ،چاول سستے ہوئے ، رپورٹ
اسلام آباد (الفجر آن لائن) ملک میں مہنگائی بڑھنے کی شرح 78ماہ کی کم ترین سطح پر آگئی۔ادارہ شماریات کی جانب سے جاری اعداد و شمار میں بتایا گیا ہے کہ نومبر 2024میں مہنگائی کی شرح 4.9فیصد کی سطح پر ریکارڈ کی گئی ہے جبکہ اکتوبر 2024میں مہنگائی 7.2فیصد پر تھی۔اعداد و شمار کے مطابق نومبر 2023میں مہنگائی کی شرح 29.2فیصد تھی جبکہ نومبر 2024میں شہری علاقوں میں مہنگائی 5.2فیصد اور دیہی علاقوں میں 4.3 فیصد ریکارڈ کی گئی۔
ادارہ شماریات کے مطابق گزشتہ ماہ کھانے پینے کی اشیا میں 0.5فیصد کا معمولی اضافہ ریکارڈ کیا گیا، گزشتہ ماہ ٹماٹر، انڈے، دال مونگ، شہد اور آلو کے نرخ میں اضافہ ریکارڈ ہوا۔ اعداد و شمار کے مطابق گھی، مکھن، ڈرائی فروٹ، مچھلی اور کوکنگ آئل مہنگا ہوا، گندم، ریڈی میڈ فوڈ، مشروبات، گندم کا آٹا، جوتے اور الیکٹرانک کا سامان بھی مہنگا ہوا۔رپورٹ کے مطابق گزشتہ ماہ چکن، دال ماش، سبزیاں ،پھل ،دال چنا، پیاز، مصالحہ جات، چینی، گڑ، دال مسور اور چاول سستے ہوئے ہیں۔
