دوستی و دشمنی کھل کر نبھاتا ہوں،سیاسی جماعتوں کے پاس جانے کا مقصد نیشنل کاز ہے،فیصل واوڈا
ملک روز دھرنا اور احتجاج برداشت نہیں کرسکتا، عمران خان کی جان پر سیاست کرنے کی کوشش کی جارہی ، علی امین مولا جٹ کی سیاست کر رہے ہیں،پی ٹی آئی اپنا قبلہ درست کرلے، مصطفی کمال کے ہمراہ میڈیا سے گفتگو
کراچی (الفجر آن لائن) سینیٹر فیصل واوڈا نے کہا ہے کہ دوستی اور دشمنی کھل کر نبھاتا ہوں،سیاسی جماعتوں کے پاس جانے کا مقصد نیشنل کاز ہے، ملک روز دھرنا اور احتجاج برداشت نہیں کرسکتا، عمران خان کی جان پر سیاست کرنے کی کوشش کی جارہی ، علی امین مولا جٹ کی سیاست کر رہے ہیں،پی ٹی آئی اپنا قبلہ درست کرلے۔اتوار کو سینیٹر فیصل واڈا نے کراچی میں ایم کیو ایم کے مرکز بہادرآباد میں چیئرمین ایم کیو ایم ڈاکٹر خالد مقبول سے ملاقات کی اس موقع پر مصطفی کمال، انیس قائمخانی، امین الحق اور دیگر رہنماء بھی موجود تھے۔
ملاقات کے بعد میڈیا سے گفتگو کرتے ہوئے ایم کیو ایم رہنماء مصطفی کمال نے فیصل واوڈا کو ون مین آرمی قرار دیتے ہوئے کہا ہے کہ یہ ہر طرف چھائے ہوئے ہیں ، ان کا تعلق اسی شہر ہے ،ہم اس بات پر فخر کرتے ہیں۔ انہوں نے کہا کہ ایم کیو ایم ایک طاقت اور جماعت ہے، ہمیں ہمارا شیئر نہیں دیا جارہا ہے، کوئی کامن ایجنڈا ہونا چاہئے، فیصل واڈا سب کو یکجا کرنے کا کام اکیلے کر رہے ہیں۔انہوں نے کہا کہ آج یہ ہمارے پاس آئے ہیں ہم نے ان کی بات کی تائید کی ہے، اب تمام سیاسی جماعتوں کو پاکستان کو چلانے کیلئے کچھ پوائنٹس پر متفق ہونا چاہئے، اس ایجنڈے پر کوئی سیاست نہیں ہونی چاہئے۔اس موقع پر فیصل واڈا نے گفتگو کرتے ہوئے کہا کہ تمام سیاسی پارٹیوں کے پاس جانے کا مقصد نیشنل کاز ہے، میں یہاں کسی مطلب سے نہیں آیا ہوں، میں دوستی اور دشمنی کھل کر نبھاتا ہوں۔
انہوں نے کہا کہ ملکی معیشت میں سب کا کردار اہم ہے، میں اور مصطفی کمال پیار سے بھی بات کرتے ہیں اور ہاتھ مروڑ کر بھی کام کروا سکتے ہیں، میں نے بلاول زرداری کو کہا ہے کہ تمام سیاسی جماعتوں کا مینڈیٹ تسلیم کرنا ہوگا۔انہوں نے کہا کہ ملک روز دھرنا اور احتجاج برداشت نہیں کرسکتا، بانی پی ٹی آئی کی زندگی کو خطرات ہیں، ان کی جان پر سیاست کرنے کی کوشش کی جارہی ہے، علی امین مولا جٹ کی سیاست کر رہے ہیں۔انہوں نے کہا کہ خالد مقبول اور مصطفی کمال نے کہا کہ وہ بھی مولانا سے جاکر ملیں گے، ہم وفاقی حکومت سے ایک مشترکہ میٹنگ کریں گے، پی ٹی آئی کا بھی مینڈیٹ ہے ان سے اختلافات ہوسکتے ہیں مگر انہیں عزت دینی ہوگی۔انہوں نے کہا کہ پاکستان کو آگے بڑھانے کیلئے سب کو اپنا حصہ ڈالنا ،سب کا مینڈیٹ تسلیم کرنا ہوگا۔انہوں نے کہا کہ پی ٹی آئی اپنا قبلہ درست کرلے۔
