ڈائیلاسز مریض کے علاج کیلئے فنڈز 10لاکھ تک بڑھا دیئے گئے، ملتان نشتر ہسپتال واقعے کی رپورٹ طلب
فنڈز نہ ہونے کے عذر پر ڈائیلاسز کا رکنا افسوسناک، پی ایچ سی ڈائیلاسز سنٹرز کی کڑی مانیٹرنگ کرے،مریضوں کیلئے مفت ادویات،ٹیسٹ یقینی بنائے جائیں، وزیراعلی پنجاب…… محکمہ صحت کی کارکردگی کے تعین کیلئے کے پی آئی مقرر کرنے پربھی اتفاق
لاہور (الفجر آن لائن) وزیراعلی پنجاب مریم نواز نے پہلے ’چیف منسٹر ڈائیلاسز پروگرام کارڈ‘کی منظوری دیتے ہوئے کہا ہے کہ فنڈز نہ ہونے کے عذر پر ڈائیلاسز کا رکنا افسوسناک ہے، پنجاب ہیلتھ کیئر کمیشن کو صوبہ بھر میں ڈائیلاسز سنٹرز کی کڑی مانیٹرنگ کرے،مریضوں کیلئے مفت ادویات اور ٹیسٹ یقینی بنائے جائیں۔
منگل کو وزیراعلی پنجاب مریم نواز کی زیر صدارت خصوصی اجلاس کا انعقاد ہوا جس میں ہیلتھ پروگرام اور منصوبوں پر پیشرفت کا جائزہ لیا گیا۔مریم نواز نے ملکی تاریخ کے پہلے ’چیف منسٹر ڈائیلاسزپروگرام کارڈ‘کی منظوری دیتے ہوئے کہا کہ ڈائیلاسز مریضوں میں ایڈز پھیلنا شرمناک ہے، فنڈز نہ ہونے کے عذر پر ڈائیلاسز کا رکنا افسوسناک ہے، یہ جاری رہنا چاہئے۔ انہوں نے پنجاب میں امراض گردہ میں مبتلا ہر مریض کیلئے ساڑھے 8لاکھ روپے ڈائیلاسز کی مد میں اور ڈیڑھ لاکھ روپے ٹیسٹ وغیرہ کیلئے مختص کرنے کا اعلان کرتے ہوئے حکام سے ملتان نشتر ہسپتال واقعے کی رپورٹ 24 گھنٹوں میں طلب کرلی۔وزیر اعلی پنجاب نے ڈائیلاسز مریضوں کیلئے مفت ادویات اور ٹیسٹ یقینی بنانے کی ہدایت کی اور پنجاب ہیلتھ کیئر کمیشن کو صوبہ بھر میں ڈائیلاسز سنٹرز کی کڑی مانیٹرنگ کا حکم دیا۔اجلاس میں پنجاب میں مزیدڈائیلاسز یونٹ قائم کرنے پراصولی اتفاق کیا گیا جبکہ مریم نواز نے پنجاب ہیلتھ کیئرکمیشن کوڈائیلاسزسینٹر میں ایس اوپیز عمل درآمد یقینی بنانے کی ہدایت کی۔اجلاس میں محکمہ صحت کی کارکردگی کے تعین کیلئے کے پی آئی مقرر کرنے پر بھی اتفاق کیا گیا۔
وزیراعلی کو پی آئی سی 2اور نواز شریف انسٹیٹیوٹ آف کارڈیالوجی سرگودھا کے زیر تکمیل پراجیکٹ بارے رپورٹ پیش کی گئی جس پر مریم نواز نے پی آئی سی 2کو اسٹیٹ آف آرٹ ہسپتال بنا نے کی ہدایت کرتے ہوئے کہا کہ امراض قلب کے علاج کیلئے جدید ترین ٹیکنالوجی، آلات اور ادویات لائی جائیں، سپیشلسٹ ڈاکٹرز کی جدید ترین ٹریننگ کرائی جائے اور ماسٹر ٹرینر تعینات کئے جائیں۔
