عوام مسائل کا حل چاہتے ،تشدد کی سیاست کو رد کر دیا ،یہ اب جو مرضی کریں دال نہیں گلنے والی،دہشتگردی کے خلاف جو ہوسکا وفاقی حکومت کرے گی، وفاقی وزیر کا لاہور میں کرسمس تقریب سے خطاب
لاہورر(الفجر آن لائن) وفاقی وزیر اطلاعات عطاء تارڑ نے بانی پی ٹی آئی کی سول نافرمانی کی کال کو مضحکہ خیز قرار دیتے ہوئے کہاہے کہ عوام نے تشدد کی سیاست کو رد کر دیا وہ مسائل کا حل چاہتے ہیں، یہ اب جو مرضی کریں دال نہیں گلنے والی،دہشتگردی کے خلاف جو ہوسکا وفاقی حکومت کرے گی۔ لاہور میں کرسمس تقریب سے خطاب کرتے ہوئے وفاقی وزیر اطلاعات عطا تارڑ نے کہا کہ اقلیتوں کے حقوق کا تحفظ میرے اوپر زیادہ لازم ہے، ہم کرسمس کو بھرپور طریقے سے منائیں گے، کرسچن کمیونٹی کی ہر خوشی اور غم میں ساتھ کھڑا ہوں، کرسچن کمیونٹی نے دنیا کے بہترین فائٹر پائلٹ پیدا کئے، تمام کمیونٹیز ملک کیلئے کردار ادا کررہی ہیں۔
انہوں نے کہا کہ ہمیں ظلم، تشدد اور نفرت کے خلاف آواز اٹھانی چاہئے، پاکستان اللہ کی بڑی نعمت ہے، ہمیں جو بھی نعمتیں حاصل ہیں وہ اس ملک کی بدولت ہیں، اس ملک میں اب تشدد اور انتشار نہیں ہوسکتا، جہاں بھی تشدد ور انتشار ہوگا ہم سیسہ پلائی دیوار بن کر کھڑے ہوں گے۔ انہوں نے کہا کہ یہ ملک ہے تو سیاستیں اور وزارتیں ہیں، ہم نے ملک کے مفاد میں چیزوں کو آگے لے کر چلنا ہے، بیرونی سرمایہ کاری بڑھ رہی ہے، انٹرسٹ ریٹ 15فیصد اور مہنگائی 4.8فیصد پر ہے، مہنگائی 2018کے بعد سب سے کم سطح پر پہنچ گئی ہے۔ انہوں نے کہا کہ بانی پی ٹی آئی کی سول نافرمانی کی کال مضحکہ خیز ہے جو ناکام ہوگی،عوام نے نافرمانی اور تشدد کی سیاست کو رد کر دیا ہے، جھوٹا بیانیہ بنایا ،لاشوں کی سیاست کی جارہی ہے، پوچھنا چاہتا ہوں بھاگے کیوں؟ کھڑے رہتے۔
انہوں نے کہا کہ لوگ مسائل کا حل چاہتے ہیں، لوگ یہ نہیں چاہتے کہ دھرنے شروع کردو، اب یہ جو مرضی کریں دال نہیں گلنے والی۔ انہوں نے رہنماء پی ٹی آئی لطیف کھوسہ پر تنقید کرتے ہوئے کہا کہ انہیں اب آرام کرنا چاہئے،ان کی سیاست کی عمر نہیں رہی۔ انہوں نے کہا کہ انتشار کی اجازت ہرگز نہیں دی جائے گی، دہشتگردی کے خلاف نیشنل ایکشن پلان پر عمل ہو رہا ہے۔ انہوں نے کہا کہ خیبرپختونخوا حکومت صوبے میں امن و امان کے معاملے پر سنجیدہ نہیں،کرم میں لاشیں گریں دیگر معاملات ہوئے،یہ جھوٹے بیانئے پر سارا پیسہ لگا رہے ہیں، دہشتگردی کے خلاف جو کچھ ہوسکا وفاقی حکومت کرے گی۔
