ایک صوبے کی پولیس کا دوسرے صوبے پر سرکاری وسائل سے حملہ قومی یکجہتی کو پارہ پارہ کرنے کے مترادف ہے، یہ کون سا احتجاج ہے جہاں سرکاری وسائل استعمال کئے جارہے ہیں؟، وزیراعلی پنجاب
لاہور (الفجرآن لائن)وزیراعلی پنجاب مریم نواز نے پی ٹی آئی احتجاج کے دوران حملوں سے پولیس اہلکاروں کے زخمی ہونے کی مذمت کرتے ہوئے کہاہے کہ ایک صوبے کی پولیس کا دوسرے صوبے پر سرکاری وسائل سے حملہ قومی یکجہتی کو پارہ پارہ کرنے کے مترادف ہے، یہ کون سا احتجاج ہے جہاں سرکاری وسائل استعمال کئے جارہے ہیں؟ ،پنجاب پولیس غیر مسلح ،پی ٹی آئی مظاہرین نے حملوں میں وہ اسلحہ استعمال کیا جو صرف پولیس کے پاس ہوتا ہے ۔ایک بیان میں وزیراعلی پنجاب مریم نواز نے پنجاب پولیس افسرا ن و اہلکاروں پر حملے ،پولیس کانسٹیبل پر فائرنگ کی شدید مذمت کرتے ہوئے کہا ہے کہ پی ٹی آئی احتجاج کے دوران حملوں سے ایس پی، ڈی ایس پی اور ایس ایچ او سمیت 20سے زائد پولیس اہلکاروں کا زخمی ہونا افسوسناک ہے، مظاہرین کے پاس شارٹ مشین گنز، آنسو گیس، چاقو، ماسک وغیرہ دیکھے گئے ہیں۔ انہوں ے کہا کہ مظاہرین نے پنجاب پولیس پر حملوں میں ایسا اسلحہ استعمال کیا جو صرف پولیس کے پاس ہی ہوتا ہے، غازی بروتھا، میانوالی، ہزارہ موٹروے اور دیگر مقامات پر فائرنگ کی گئی، پنجاب پولیس کو پہلے بھی تصادم سے بچنے کیلئے غیر مسلح رکھا گیا تھا اور اب بھی غیر مسلح ہے۔انہوں نے کہا کہ پچھلے احتجاج میں بھی ایک کانسٹیبل شہید ہوا تھا اور 25سے زائد زخمی ہوئے تھے، ایک صوبے کی پولیس کا دوسرے صوبے پر سرکاری وسائل سے حملہ قومی یکجہتی کو پارہ پارہ کرنے کے مترادف ہے، یہ کون سا احتجاج ہے جہاں سرکاری وسائل استعمال کئے جارہے ہیں؟ ،احتجاج کے بجائے یہ تحریک مسلح دہشت گردی کی کاوش ہے۔
